Në procesin penal ndaj Plarent Dervishaj dhe Julian Meçe, të akuzuar për atentatin e 1 nëntorit 2019, ku u vra Andi Maloku, ndërsa u plagos ish-prokurori Arjan Ndoj dhe miku i tij Aleksandër Laho, i njohur me nofkën Rrumi, SPAK vijoi me leximin e disa dëshmive.
Fillimisht u lexuan dëshmitë e tre të miturve që panë makinën Mercedes Benz që u përdor në atentat. Në këtë automjet që u gjet në Shkafanë u zbuluan dhe provat që fundosën Redian Rrajën, pasi ai është dënuar me burgim të përjetshëm si ekzekutor.
Në vijim u lexua dhe dëshmia e Aleksandër Lahos, i njohur si Rrumi, i cili ndodhet në arrati pasi kërkohet nga SPAK si kreu i një organizate kriminale që tjetërsontë prona në Gjirin e Lalzit.
“Jam i papunë dhe jetoj jashtë shtetit në Gjermani. Më parë kam patur emrin Pëllumb Muharremi. Më 1 nëntor 2019 me Stiven Mziun dhe Agron Bejdollin kam shkuar te lokali Koral për drekë. Pasi drekuam kemi dalë dhe Arjani (Arjan Ndoj) më kërkoi që të shkoja me makinën e tij, deri në Sukth. Ngjarjen nuk e mbaj mend, për shkak edhe të gjendjes shëndetësore. Deklarime me të zgjeruara do t’i jap para prokurorit të çështjes. Pasi pashë pamjet filmike, i dalloj personat por nuk i identifikoj dot”, shprehet Rrumi. Pas leximit të dëshmisë reagoi Plarent Dervishaj.
“Dëgjova zotin prokuror që tha; të vijnë dëshmitarët në gjyq dhe të japin shpjegimet këtu dhe ta shohin nëse jam unë apo nuk jam unë, apo bashkëvuajtësi im. Në bazë të dëshmisë që ka dhënë Aleksandër Laho, dua të pyes z.prokuror; i besoni asaj dëshmie apo jo? Sikur nuk shkojnë këto gjëra, janë kontradiktore?”, tha Dervishaj.
“Unë shikoj dhe dëgjoj dëshmitarë që nuk kanë lidhje fare me gjykimin tim. E nderuar, më datë 1 nëntor më ka arrestu policia, s’më ka gjetur faktor plotësues, asgjë. Nuk ju kuptoj”, reagoi i pandehuri tjetër Julian Meçe.
Dy të pandehurit Dervishaj e Meçe pritet të japin dëshminë e tyre, nëse do të japin pëlqimin. Po ashtu do dëgjohen dhe bashkë të pandehurit e tjerë, të gjykuar në procese të ndara, për të njëjtën çështje, sikurse janë Redian Rraja apo Arion Halilaj.
