Inspektorati Kombëtar i Mbrojtjes së Territorit (IKMT) ka ndëshkuar me masë administrative gjobë subjektin “Gjikuria”, pasi ka konstatuar një vendndodhje të paligjshme të depozitimit të mbetjeve inerte dhe dherave në krye të fshatit turistik të Dhërmiut.
Gjatë një inspektimi të kryer nga Drejtoria Qendrore e IKMT-së, u vu re se kompania po kryente hedhje të dherave të dala nga gërmimet pa qenë e pajisur me Leje Mjedisi të tipit B (shtojca 5.2), duke shkaktuar një impakt të rëndë vizual dhe mjedisor në një nga zonat më të lakmuara të bregdetit jugor.
Masat e marra nga IKMT
Për shkeljet e rënda të konstatuara në terren, IKMT ka aplikuar sanksionet e mëposhtme ndaj kompanisë:
Dënim me gjobë në vlerën e 1,000,000 lekëve.
Pezullim të aktivitetit të depozitimit deri në pajisjen me lejen përkatëse sipas legjislacionit në fuqi.
Detyrim për rehabilitim: Kompanisë i është lënë një afat i arsyeshëm për të eliminuar pasojat në mjedis dhe për të kthyer zonën në gjendjen e mëparshme
"Klienti" i preferuar i tenderave publikë
Ky ndëshkim,edhe pse me vlera modeste në raport me rëndësinë e saj, vjen ndaj një prej kompanive më të rëndësishme në vend, e cila njihet gjerësisht për afërsinë e saj me qeverinë dhe institucionet publike. Ndër vite, "Gjikuria" ka qenë përfituese e dhjetëra miliona eurove përmes tenderave publikë, koncesioneve dhe projekteve të mëdha të infrastrukturës të rrugëve dhe PPP-ve të rëndësishme, shpesh e akuzuar nga opozita dhe zërat kritikë për rrugë të privilegjuara kontraktimi.
Përtej lidhjeve të forta që kompania gëzon në korridoret e pushtetit ekzekutiv, këtë herë ndotja e hapur në mes të Dhërmiut ka detyruar inspektorët e IKMT-së të ndërhyjnë duke prerë gjobën dhe duke kërkuar tërheqjen e menjëhershme të inerteve nga maja e fshatit turistik.
Mbetet për t'u parë nëse ky penalizim do të zbatohet me rigorozitet apo nëse do të mbetet thjesht një lëvizje formale për të qetësuar reagimet e banorëve dhe pushuesve në prag të sezonit.
