Gjykata e Posaçme ka pranuar ankimin e banorëve të Rrjollit dhe ka rrëzuar vendimin e SPAK për mosfillimin e hetimeve lidhur me kallëzimin e tyre për projektin turistik “Baks Bay”.
Gjyqtarja Flojera Davidhi ka urdhëruar Prokurorinë e Posaçme të regjistrojë procedimin penal dhe të nisë hetimet për pretendimet e ngritura nga banorët, të cilat lidhen me dyshime për falsifikim dokumentesh, korrupsion dhe parregullsi në ndërtimin e resortit.
Banorët pretendojnë se projekti po zhvillohet mbi toka të përfituara në mënyrë të paligjshme dhe kanë kërkuar verifikimin e dokumentacionit të pronësisë. Në kallëzimin e tyre janë ngritur pretendime për falsifikim dokumentesh ndaj Fatmir Shpellzës, ndërsa ndaj kompanisë “Gener 2” të Bashkim Ulajt janë ngritur pretendime për ndërtim të paligjshëm.
Konflikti për projektin ka shkaktuar prej muajsh tensione në zonë. Banorët e Rrjollit protestojnë prej rreth tetë muajsh kundër ndërtimit të resortit, ndërsa gjatë kësaj periudhe janë regjistruar edhe përplasje me punonjës të sigurisë dhe efektivë të policisë.
Me vendimin e GJKKO-së, çështja rikthehet tashmë në SPAK, i cili duhet të regjistrojë procedimin dhe të hetojë pretendimet e paraqitura në kallëzim.
