Një ngjarje tronditëse është zbuluar në qytetin Orange, në departamentin Vaucluse të rajonit Provence në Francë, ku policia gjeti trupat e pajetë të pesë foshnjave gjatë një kontrolli në banesën e një çifti.
Sipas burimeve pranë hetimit, mbetjet e foshnjave ishin fshehur brenda kutive në shtëpinë e bashkëshortëve. Zbulimi u bë gjatë një operacioni policor, ndërsa autoritetet kanë nisur hetime për të zbardhur rrethanat e vdekjes së tyre.
Mediat franceze raportojnë se gruaja e çiftit solli në jetë një foshnjë një ditë më parë dhe fëmija është gjallë dhe në gjendje të mirë shëndetësore.
Ky nuk është rasti i parë i dyshuar për infanticid në Francë gjatë këtij viti. Në muajin shkurt, një grua rreth 50 vjeç u arrestua pasi trupat e dy foshnjave u gjetën në frigoriferin e saj në departamentin Haute-Saône. Një rast tjetër i ngjashëm u regjistrua edhe në vitin 2015 në jug të Francës, ku pesë trupa foshnjash u zbuluan në frigoriferin e një banese.
Autoritetet franceze vijojnë hetimet për të përcaktuar identitetin e foshnjave, kohën e vdekjes dhe përgjegjësinë penale të personave të përfshirë.
