Fatri Islamaj është zgjedhur anëtar i Këshillit të Lartë Gjyqësor (KLGJ) nga radhët e gjyqtarëve të gjykatave të Apelit.
Islamaj siguroi 190 vota, duke fituar përballë kandidates tjetër në garë, Igerta Hysi, e cila mori 171 vota.
Procesi i votimit u zhvillua mes gjyqtarëve, të cilët u thirrën të zgjidhnin përfaqësuesin e tyre në organin kushtetues që administron dhe garanton funksionimin e sistemit gjyqësor.
Me rezultatin e votimit, Fatri Islamaj siguroi shumicën e nevojshme dhe do të marrë detyrën si anëtar i KLGJ-së, duke përfaqësuar në Këshill gjyqtarët e nivelit të Apelit.
Këshilli i Lartë Gjyqësor është organi përgjegjës për qeverisjen e sistemit gjyqësor në Shqipëri dhe ka kompetenca që lidhen, ndër të tjera, me emërimin, vlerësimin, ngritjen në detyrë dhe administrimin e karrierës së gjyqtarëve, si dhe me mirëfunksionimin e gjykatave.
