Hetimet për vrasjen e Edmond Sulës, i njohur edhe si Ali Sula, janë rikthyer me kontrolle të reja në zonën e Bërxullës.
Burime për VNA bëjnë me dije se kontrollet janë kryer me vendim gjykate dhe janë shoqëruar me marrjen në pyetje të disa personave. Sipas të njëjtave burime, personat e kontrolluar dyshohet se kanë pasur konflikte pronësie me viktimën, pistë kjo që po verifikohet nga grupi hetimor.
Vrasja e Edmond Sulës ka mbetur një nga ngjarjet e rënda kriminale që vijon të jetë nën hetim, ndërsa verifikimet e fundit tregojnë se prokuroria dhe policia po përpiqen të rindërtojnë rrethin e konflikteve të mundshme që mund të kenë çuar në eliminimin e tij.
Kontrollet në Bërxullë janë pjesë e veprimeve hetimore për të gjetur prova të reja, si dhe për të sqaruar rolin e personave që kanë pasur përplasje të mëparshme me Sulën. Deri tani nuk ka një njoftim zyrtar për persona të arrestuar, ndërsa të shoqëruarit janë marrë në pyetje për llogari të hetimit.
