Ambasada e Izraelit në Portugali i ka kërkuar autoriteteve anulimin e koncertit të reperit amerikan Kanye West, i planifikuar të zhvillohet sonte në Algarve. Ambasadori Oren Rosenblatt u ka bërë gjithashtu thirrje qytetarëve të mos marrin pjesë në event, duke argumentuar se deklaratat e mëparshme të muzikantit për Adolf Hitlerin, nazizmin dhe hebrenjtë përbëjnë gjuhë urrejtjeje dhe glorifikim të regjimit nazist. Sipas tij, disa vende kanë ndërmarrë masa për të penguar aktivitetet e West ose hyrjen e tij në territor.
Ambasadori izraelit theksoi se kërkesa nuk lidhet me një qëndrim politik ndaj Izraelit, por me deklaratat që, sipas tij, nxisin urrejtje ndaj hebrenjve. Rosenblatt argumentoi se shoqëritë demokratike nuk duhet t’u japin hapësirë publike personave që promovojnë antisemitizmin dhe nazizmin, duke e krahasuar situatën me rastet kur një artist nxit urrejtje ndaj komuniteteve të tjera.
Nga ana tjetër, organizatorët e koncertit kanë kundërshtuar kërkesën për anulim. Torkato George, drejtor i përgjithshëm dhe bashkëthemelues i organizatës “Raya Culture”, deklaroi se nuk ekzistojnë arsye sigurie që justifikojnë anulimin e eventit dhe se kërkesat e ambasadës bazohen në “dezinformata”. Koncerti pritet të zhvillohet sipas planit në Algarve, pavarësisht polemikës së krijuar rreth qëndrimeve të mëparshme të reperit amerikan.
