Inspektimet e përditshme në bregdet dhe buzëqeshjet para kamerave po kthehen në një telenovelë të bukur verore, të ministrit të Punëve të Brendshme, Besfort Lamallari, dhe drejtorit të Përgjithshëm të Policisë, Skënder Hita. Ata ishin sot në Himarë për të na treguar se si kontrolli i jahteve tani bëhet direkt në det, duke u lehtësuar punën vizitorëve. Çdo gjë duket perfekte në video, aq sa po të dëgjosh retorikën e tyre, Shqipëria ngjan me një oaz absolut qetësie ku e vetmja shqetësim i policisë është t'u urojë pushime të mbarë jahteve luksoze.
Por pas kësaj skene të kuruar mirë propagande fshihet një heshtje komike, po aq sa edhe e frikshme. Vetëm pak ditë më parë, vendi më elitar i turizmit në Shqipëri, Palasa, u trondit nga krismat e armëve në një mjet lundrues.
E ndërsa policia u vu në ndjekje të të dyshuarve për orë të tëra, institucionet harruan "pa dashje" të nxirrnin qoftë edhe një njoftim të vetëm zyrtar. Po aq i pazakontë ishte edhe qëndrimi i ministrit të Brendshëm, i cili nuk e komentoi ngjarjen, madje e shmangu atë edhe gjatë intervistave televizive. Në të njëjtën linjë ishte edhe drejtori i Përgjithshëm i Policisë së Shtetit, i cili, ndonëse shfaqet shpesh në deklarata publike për çështje të tjera, përfshirë paralajmërimet ndaj qytetarëve që publikojnë “review” negative për biznese, nuk dha asnjë reagim për këtë ngjarje.
Po të mos ishte për mediat që e nxorrën ngjarjen në dritë, publiku ende do të besonte se në detin e Palasës plasin vetëm shishet e shampanjës.
Megjithatë, ministri i Brendshëm gjen kohë të bëjë video duke folur për sukseset e stinës, por çuditërisht nuk guxon të flasë dhe të përmend asnjë emër për ngjarjen në fjalë.
Është vërtet paradoksale të shohësh ministrin që udhëton posaçërisht drejt Himarës thjesht për të xhiruar videon e radhës me retorikën e konsumuar të prioriteteve dhe sigurisë, ndërkohë që vazhdon të mbajë gojën mbyllur për atë që ndodhi realisht aty.
Të bësh sikur nuk ka ndodhur asgjë nuk është thjesht paaftësi, por një rrezik për qytetarë që nesër mund të përballen me të fortët e Palasës, që dhe ministri ka frikë t’u përmend emrin. Dhe me këtë standard, vlen të thuhet se policia mund të jetë shumë e shpejtë për të montuar video për facebokun e ministrit, por në realitet ka frikë të arrestojë personat që shfaqen me armë në det.
