Skandali i lidhur me financierin e dënuar për krime seksuale Jeffrey Epstein po hedh hije mbi vizitën shtetërore të Mbretit Charles III dhe Mbretëreshës Camilla në Shtetet e Bashkuara.
Pallati mbretëror konfirmoi se gjatë qëndrimit në SHBA, mbreti nuk do të takohet me viktimat e Epstein, pavarësisht kërkesave të bëra nga disa politikanë amerikanë. Avokatët e Charles dhe Camilla thanë se një takim i tillë nuk është i mundur për shkak të “hetimeve policore në vazhdim” në Britani.
Çështja lidhet drejtpërdrejt me vëllanë e mbretit, Andrew Mountbatten-Windsor, i cili kishte marrëdhënie të afërta me Epstein. Ai u zhvesh nga titujt mbretërorë për shkak të lidhjeve me financierin dhe këtë vit u arrestua nën dyshime për keqpërdorim të detyrës publike, pasi dyshohet se mund të ketë ndarë informacione konfidenciale me Epstein gjatë kohës kur shërbente si i dërguar tregtar i Britanisë. Andrew ka mohuar çdo shkelje dhe nuk është ngritur ende ndonjë akuzë ndaj tij.
Pas arrestimit të vëllait, Mbreti Charles bëri një deklaratë të rrallë publike duke mbështetur hetimin, por që atëherë ka kufizuar komentet mbi këtë çështje.
Familjarët e Virginia Giuffre, një nga gratë që pretendonte se Epstein e kishte trafikuar në Britani dhe e kishte detyruar të kryente marrëdhënie seksuale me Andrew në vitin 2001, shprehën zhgënjim për vendimin e mbretit që të mos takojë viktimat.
“Është një mundësi e humbur,” tha vëllai i saj, Sky Roberts, për Sky News.
Giuffre ndërroi jetë vitin e kaluar para publikimit të kujtimeve të saj. Fundjavën që lamë pas, familjarët organizuan një vigilje në Washington për të përkujtuar një vit nga vdekja e saj.
Ndërkohë, skandali Epstein ka tronditur edhe politikën britanike. Ish-ambasadori i Britanisë në SHBA, Peter Mandelson, u shkarkua vitin e kaluar pasi dokumente të publikuara treguan lidhjen e tij të ngushtë me Epstein. Këtë vit ai u arrestua nën dyshime se kishte ndarë informacione konfidenciale qeveritare me financierin në fund të viteve 2000.
Mandelson nuk akuzohet për shkelje seksuale dhe ka mohuar çdo veprim të paligjshëm, ndërsa hetimet ndaj tij vazhdojnë.
Në Londër, ndërkohë, Parlamenti britanik po dëgjon dëshmi nga zyrtarë të tjerë lidhur me këtë çështje, ndërsa skandali Epstein vazhdon të trondisë institucionet britanike dhe familjen mbretërore.
