Në Shtëpinë e Bardhë zhvillohet këtë të mërkurë një takim me peshë të lartë politike mes Shteteve të Bashkuara, Danimarkës dhe Groenlandës, në fokus të të cilit është e ardhmja e Groenlandës, ishullit më të madh në botë dhe territor gjysmë-autonom nën sovranitetin danez.
Zëvendëspresidenti amerikan JD Vance po pret ministrat e jashtëm të Danimarkës dhe Groenlandës, së bashku me Sekretarin amerikan të Shtetit, Marco Rubio, në një moment kur tensionet janë rritur ndjeshëm pas deklaratave të presidentit Donald Trump, i cili ka përsëritur se SHBA “ka nevojë për Groenlandën” për arsye të sigurisë kombëtare.
Në Nuuk, kryeqytetin e Groenlandës, shqetësimi është i dukshëm. Mesazhe dixhitale që përmendin “Trump”, “Groenlandën” dhe “sovranitetin” shfaqen vazhdimisht, ndërsa qytetarët shprehin hapur kundërshtimin ndaj çdo ideje për shitjen apo marrjen e territorit. “Ne nuk jemi për shitje. Vendi ynë nuk është për shitje,” thonë banorët, duke theksuar aspiratën për një Groenlandë të pavarur dhe të mirëqeverisur.
Groenlanda është territor gjysmë-autonom i Danimarkës dhe pjesë e hapësirës strategjike të NATO-s. Kryeministrja daneze, Mette Frederiksen, ka paralajmëruar se çdo përpjekje e SHBA-së për të marrë kontrollin e ishullit me forcë do të përbënte një goditje fatale për aleancën transatlantike dhe marrëdhëniet SHBA-BE.
Presidenti Trump këmbëngul se Groenlanda është jetike për sigurinë amerikane, duke pretenduar se, nëse SHBA nuk vepron, hapësira do të shfrytëzohet nga Rusia ose Kina. Kjo ka shtyrë disa vende evropiane, përfshirë Gjermaninë dhe Britaninë e Madhe, të diskutojnë rritjen e pranisë ushtarake të NATO-s në Groenlandë dhe në Arktik, si alternativë ndaj çdo skenari përshkallëzues.
Takimi në Uashington shihet si një provë kyçe: kompromis apo përplasje. Vendimet që mund të dalin prej tij nuk do të prekin vetëm Groenlandën, por edhe të ardhmen e NATO-s dhe ekuilibrat e sigurisë në Arktik.
