Një artikull i i gazetës izraelite Haaretz raporton se një grup prej rreth 160 të rinjsh gjermanë – politikanë, gazetarë dhe drejtues biznesi – e kanë përshkruar udhëtimin e tyre në Izrael si një tur të kontrolluar rreptësisht nga autoritetet, më shumë propagandistik sesa shkëmbim i sinqertë kulturor apo diplomatik.
Udhëtimi, i organizuar nga Ministria e Jashtme izraelite dhe i mbuluar tërësisht me shpenzime, u fokusua pothuajse tërësisht tek mesazhet e sigurisë kombëtare dhe narrativa nacionaliste, ndërsa sipas pjesëmarrësve munguan zërat kritikë, perspektivat e opozitës, pikëpamjet palestineze dhe çdo diskutim mbi diplomacinë apo paqen.
Disa pjesëmarrës pretenduan se u nxitën të jepnin deklarata pozitive, të cilat më pas u publikuan në mediat izraelite. Ata thonë se u dekurajuan të kritikonin qeverinë, dhe në disa raste madje u krijua frikë se çdo koment i hapur kritik mund t’i stigmatizonte si “pro-Hamas”.
Gazetarët që morën pjesë në tur raportuan se mbulimi mediatik dukej i koordinuar dhe se brifingjet e planifikuara për çështjet humanitare u zëvendësuan me takime të mbyllura ushtarake “off the record”.
Polemika u thellua edhe nga komentet e një udhërrëfyesi të identifikuar si Stas Eytan Sternberg, i cili sipas delegatëve shprehu hapur pikëpamje të ekstremit të djathtë, pro-vendbanimeve dhe deklaroi se ishte “i zhgënjyer që lufta në Gaza kishte mbaruar”. Ai dyshohet gjithashtu se ka shpërndarë në rrjete sociale thirrje për boshatisjen e Gazës nga palestinezët dhe zëvendësimin e saj me vendbanime hebraike.
Në përfundim, të rinjtë gjermanë thanë se u trajtuan thjesht si “përçues mesazhesh” të qeverisë izraelite, duke e përshkruar të gjithë vizitën si një platformë propagande, pa asnjë qasje diplomatike apo përpjekje për ndërtimin e paqes.
