Gjykata e Shkallës së Parë e Juridiksionit të Përgjithshëm në Korçë caktoi masën e sigurisë "detyrim për t’u paraqitur" ndaj Alti Nallbatit, vëllait të deputetit Bledjon Nallbati. Ai ishte arrestuar pak ditë më parë, pas një incidenti me një shofer kamioni në zonën e Bilishtit. Njoftimi i gjykatës: Më datë 06.05.2025, ora 12:30, u zhvillua në Gjykatën e Shkallës së Parë të Juridiksionit të Përgjithshëm Korçë seanca me objekt: “Vlerësimi i arrestimit në flagrancë dhe caktimi i masës së sigurimit ‘Detyrim për t’u paraqitur në policinë gjyqësore’ ndaj shtetasit A.N., i dyshuar për kryerjen e veprave penale ‘Prishja e qetësisë publike’ dhe ‘Pengimi i qarkullimit të mjeteve të transportit’, të parashikuara nga nenet 274/1 dhe 293 të Kodit Penal.”
Në përfundim të shqyrtimit, gjykata vendosi:
Pranimin e kërkesës.
Vlerësimin si të ligjshëm të arrestimit në flagrancë.
Caktimin e masës së sigurimit “Detyrim për t’u paraqitur në policinë gjyqësore” ndaj shtetasit A.N.
