Pronari i një lokali në Durrës “trokiti” në derën e Agjencisë së Mbikqyrjes Policore dhe denoncoi se shefi i sektorit kundër narkotikëve Gazmir Preci në Durrës i kishte vënë “gjobë”. Sipas denoncuesit, zyrtari i policisë e kishte thirrur ne zyrë dhe i kishte thënë se kishte probleme te lokali, pasi nuk kishte siguruar 3 vajza që punonin aty. Pas takimit në zyrë, ai iu tha zyrtarëve të AMP-së, se Preci i kishte dërguar një sekser, i cili i kishte kërkuar shumën prej 20 mijë eurosh, me qëllim që ta linte të punonte. Pasi mori denoncimin, AMP informoi SPAK dhe vendosën që të vëzhgonin zyrtarin e policisë. Prokurorja e cështjes, Enkeleida Millonai dha autorim që të bëhej dorëzimi i parave. Shuma prej 20 mijë eurosh iu dha me numër serie pronarit të lokalit. Ai e telefonoi Precin duke i thënë se nuk kishte nevojë për ndërmjetës, por do ta takonte vetë. Takimi vendoset në një local në Kinostudio dhe AMP pajis me pajisje regjistruese biznesmenin. Në momentin që Gazmir Preci ulet në tavolinë, pasi bëjnë pak minuta bisedë, biznesmeni I dorëzon paratë. Agjentët e AMP-së që po vëzhgonin takimin, ndërhynë dhe arrestuan shefin e antidrogës në Policinë e Durrësit. Ndaj Gazmir Precit rëndon akuza e korrupsionit dhe pritet të përballet me gjykatën e Posacme për masën e sigurisë.
