Komandanti i hekurudhës që u bë deputet i PPSH-së në vitin 1991 ka një histori të veçantë. Në Kuvendin e parë pluralist, Fadil Nasufi, sot deputet i Partisë Socialiste, ishte pjesë e Partisë së Punës së Shqipërisë. Gjatë atij mandati, ai u bë i njohur për mbështetjen e kandidaturës së Ramiz Alisë për President në prill të vitit 1991, duke argumentuar kështu votën e tij:
“Unë besoj që ai është qytetar dhe demokrat i klasit të parë dhe e bashkoj mendimin tim me gjithë ata kolegë deputetë që me dashamirësi rekomanduan edhe vërejtje, që demokracia në Shqipëri, nën drejtimin e shtetit prej shokut Ramiz, të realizohet në rrugë të mbarë, sipas dëshirës së popullit, larg pasioneve partiake. Ju ftoj ta votojmë njëzëri kandidaturën e shokut Ramiz, pasi nuk kemi ç’të shtojmë në biografinë e njerëzve si ai, biografi të cilën ia ka bërë populli.”
Fadil Nasufi dhe Angazhimi Politik
Në mandatin e parë pluralist, Nasufi ishte një ndër deputetët që mbështeti fort udhëheqjen e Ramiz Alisë, duke e vlerësuar atë si ideator dhe garantues të demokracisë në Shqipëri. Ai e shprehu qartë këtë bindje në fjalimin e tij në Kuvend:
“I nderuar Kryetar,
Të nderuar deputetë,
Zërin tim këtu në Kuvend e sjell si bartës të votëbesimit që më ka dhënë populli dhe si përfaqësues i rinisë. Bashkimi i Rinisë, kur vuri kandidaturën e shokut Ramiz në fushatën elektorale, vlerësoi tek ai ideatorin dhe realizuesin e pakthyeshëm të demokracisë në Shqipëri, dhe ai bëri ftesën e parë zyrtare për demokraci. Dhe rinia nuk ka gabuar.
Kur votojmë për Ramiz Alinë si President, ne nuk kemi kompleksin e ithtarit apo të timonierit, siç u përpoq ta ngushtojë seriozitetin e deputetëve të Partisë së Punës një zotëri. Por besoj se, si askush tjetër, Ramiz Alia do të dijë t’i japë gjithnjë e më shumë udhë qytetërimit dhe demokracisë për realitetin e sotëm shqiptar, aq shumë kontradiktor.
Unë besoj që ai është qytetar dhe demokrat i klasit të parë dhe e bashkoj mendimin tim me gjithë ata kolegë deputetë, që me dashamirësi rekomanduan edhe vërejtje, që demokracia në Shqipëri, nën drejtimin e shtetit prej shokut Ramiz, të realizohet në rrugë të mbarë, sipas dëshirës së popullit, larg pasioneve partiake.
Barrët e përgjegjësisë që ka mbajtur shoku Ramiz Alia mendoj se do ta bëjnë edhe më shumë përgjegjës ndaj së ardhmes së Shqipërisë halleshumë. Unë e kuptoj që zgjedhja e Presidentit, për momentet e vështira që po kalojmë, para se të jetë nder, solemnitet dhe kurorëzim, është në radhë të parë përgjegjësi e barrë e rëndë. Dhe këtë, shoku Ramiz e ka justifikuar, duke u bërë realizues dhe shpresëdhënës.
Ju ftoj ta votojmë njëzëri kandidaturën e shokut Ramiz, pasi nuk kemi ç’të shtojmë në biografinë e njerëzve si ai, biografi të cilën ia ka bërë populli.
Faleminderit!”
Nga Deputet i PPSH-së te Deputet i PS-së
Pas përfundimit të mandatit të tij të parë si deputet i PPSH-së, Nasufi vazhdoi karrierën e tij politike dhe administrative, duke shërbyer edhe si kryebashkiak i Beratit gjatë qeverisjes socialiste. Sot, ai është një ndër deputetët e mazhorancës socialiste në Kuvendin e Shqipërisë.
Në CV-në e tij, të publikuar në faqen zyrtare të Kuvendit, Nasufi rendit edhe periudhën 1986-1987 si Komandant Sektori në Hekurudhën Milot-Rrëshen-Klos, një detaj që dëshmon angazhimin e tij të hershëm në sektorin publik përpara se të hynte në politikë.
