Bandat shqiptare që veprojnë në Mbretërinë e Bashkuar po përdorin metoda gjithnjë e më të sofistikuara për të dërguar para të pista drejt Shqipërisë, sipas një artikulli të publikuar nga tabloidi britanik Daily Mail. Paratë, të fituara nga aktivitetet kriminale si trafiku i drogës, vrasjet, pastrimi i parave dhe trafikimi i qenieve njerëzore, po investohen në Shqipëri për të financuar një jetë luksoze.
Sipas Daily Mail, bandat rekrutojnë persona që paraqiten si turistë, të cilëve u jepen shuma të mëdha parash — deri në 20,000 paund — për t’i marrë me vete në Shqipëri. Një tjetër metodë e zakonshme është transportimi i parave me furgonë dhe kamionë që udhëtojnë çdo ditë midis Britanisë dhe Shqipërisë. Në vitin 2021, autoritetet sekuestruan 123,000 paund të fshehura në një furgon që transportonte mallra nga Britania, ku u arrestua Olsi Sefolli.
Policia shqiptare zbuloi gjithashtu armë të fshehura në të njëjtin furgon, i cili rezultoi në pronësi të një kompanie me bazë në Luton, në emër të Guxim Sefollit. Ky i fundit, i cili kishte jetuar ilegalisht në Britani për 7 vjet dhe kishte punuar në tregun e zi, pranoi se kishte planifikuar të investonte paratë në një apartament në Vlorë. Ai u dënua me 9 muaj pezullim për mosdeklarim të të ardhurave.
Autoritetet britanike kanë rritur presionin ndaj grupeve kriminale shqiptare. Agjencia Kombëtare e Krimeve (NCA) ka paralajmëruar për rrezikun që paraqesin këto grupe, të njohura për disiplinën dhe taktikat e dhunshme që përdorin për të dominuar tregun e kokainës. Bandat shqiptare thuhet se kanë krijuar lidhje të drejtpërdrejta me kartelët kolumbianë dhe po arrijnë të ofrojnë kokainë me çmime më të ulëta sesa rivalët e tyre.
Sipas të dhënave të fundit, në fund të vitit 2024, shqiptarët përbënin 10.6% të të gjithë të burgosurve të huaj në Angli dhe Uells — më shumë se çdo komb tjetër. Nga afro 1,100 shqiptarë të burgosur, vetëm tre janë gra. Kjo shifër përfaqëson një rritje të ndjeshme krahasuar me vitin 2010, kur shqiptarët përbënin vetëm 1.5%.
Rritja është ndikuar edhe nga vala e emigrantëve të paligjshëm që kalojnë kanalin me varka të vogla. Vetëm në vitin 2022, 12,685 shqiptarë mbërritën në Britani përmes kësaj rruge. Megjithatë, pas marrëveshjes së vitit 2022 mes qeverive britanike dhe shqiptare për kthimin e të dënuarve, numri i deportimeve është rritur. Vetëm gjatë mandatit të Rishi Sunak janë deportuar mbi 200 persona, ndërsa Britania ka paguar 8 milionë paund për modernizimin e burgjeve në Shqipëri.
Partia Laburiste ka premtuar se do të përshpejtojë procedurat e deportimit të kriminelëve të huaj, duke theksuar se nuk është e drejtë që tatimpaguesit britanikë të mbulojnë koston prej 40,000 paund në vit për çdo të burgosur.
Ndërkaq, përpjekjet për të frenuar rrjedhën e parave kriminale vazhdojnë. NCA ka nënshkruar një marrëveshje me SPAK në Shqipëri për hetimin e pasurive të shqiptarëve të dënuar në Britani. Policia shqiptare dhe agjencitë europiane të sigurisë kanë kapur raste të ngjashme në porte si Bari, Itali, ku janë zbuluar qindra mijëra paund të fshehura në furgonë me targa britanike që drejtohen nga shtetas shqiptarë.
