Emmanuel Grégoire, kryetari i ri i Bashkisë së Parisit, hyn në detyrë me një profil politik të ndërtuar mbi idenë e “rigorozitetit moral” dhe kursimit në administratë. 48-vjeçari i majtë, i zgjedhur pas një gare të fortë kundër ish-ministres së djathtë Rachida Dati, premton të ulë privilegjet dhe shpenzimet e zyrtarëve të bashkisë, ndërsa përballet me një sërë krizash të mëdha në kryeqytetin francez.
Fitoren e tij ai e shënoi simbolikisht me një tur me biçikletë në korsitë e reja të qytetit, duke sinjalizuar se politikat e Parisit për reduktimin e makinave dhe mbrojtjen e mjedisit do të vazhdojnë edhe gjatë mandatit të tij.
Grégoire fitoi zgjedhjet përballë Rachida Dati, duke siguruar mandatin e pestë radhazi për të majtën në Paris. Rezultati u konsiderua një test politik për klimën në Francë përpara zgjedhjeve presidenciale të vitit 2027, kur përfundon mandati i presidentit Emmanuel Macron.
Megjithëse sot është figura kryesore në bashkinë e kryeqytetit, Grégoire deri pak kohë më parë ishte relativisht pak i njohur për publikun. Ai ka punuar për më shumë se një dekadë në administratën e qytetit, duke drejtuar buxhetin dhe duke shërbyer për gjashtë vite si zëvendëskryetar i bashkisë nën drejtimin e Anne Hidalgo.
Në vitin 2024 ai u zgjodh deputet në parlamentin francez pas zgjedhjeve të parakohshme, ku partitë e majta krijuan një aleancë për të ndaluar rritjen e së djathtës ekstreme.
Megjithatë, mandati i tij nis në një moment të vështirë. Parisi është përfshirë nga hetime të shumta për abuzime seksuale ndaj fëmijëve në çerdhe dhe shkolla publike. Dhjetëra punonjës janë pezulluar pas ankesave për abuzim, ndërsa prindërit kanë kritikuar bashkinë për mënyrën si janë trajtuar ankesat ndër vite.
Grégoire ka premtuar një reformë të thellë të sistemit të rekrutimit dhe mbikëqyrjes së punonjësve që kujdesen për fëmijët gjatë aktiviteteve jashtë mësimit. Ai e ka cilësuar situatën si një dështim të rëndë institucional dhe ka paralajmëruar një transformim të plotë të sistemit.
Gjatë fushatës, ai zbuloi edhe një histori personale: në fëmijëri kishte qenë viktimë e një abuzimi seksual nga një punonjës i një pishine komunale. Ai tha se për vite me radhë e kishte mbajtur këtë përvojë në heshtje.
Përveç kësaj krize, kryebashkiaku i ri duhet të përballet edhe me probleme të tjera të mëdha urbane: mungesën e banesave sociale, përhapjen e qirave turistike përmes platformave si Airbnb dhe rritjen e numrit të familjeve të pastreha në rrugët e Parisit.
Në planin urban dhe mjedisor, ai ka premtuar transformime të mëdha në hapësirat publike. Sipas programit të tij, disa bulevarde do të shndërrohen në kopshte publike dhe qindra rrugë do të bëhen zona për këmbësorë, ndërsa politikat për uljen e ndotjes së ajrit do të mbeten një prioritet.
Në fjalimin e fitores, Grégoire deklaroi se Parisi duhet të mbetet një qytet që i reziston rritjes së së djathtës ekstreme dhe politikave që ai i quajti “trumpiane”. “Parisi nuk është dhe nuk do të jetë kurrë një qytet i së djathtës ekstreme”, tha ai.
