Sekretari amerikan i Shtetit, Marco Rubio, ka akuzuar Iranin se po përdor raketat me rreze të shkurtër për të kërcënuar vendet fqinje në Gjirin Persik. Në një intervistë për Al Jazeera, Rubio deklaroi se këto raketa janë projektuar për të goditur Arabinë Saudite, Emiratet e Bashkuara Arabe, Katarin, Kuvajtin dhe Bahreinin.
Sipas tij, Irani duhet të ndalojë prodhimin e dronëve dhe raketave që, sipas SHBA-së, janë përdorur në sulmet e fundit në rajon.
Rubio foli edhe për situatën në Ngushticën e Hormuzit, një nga rrugët më të rëndësishme për transportin global të naftës. Ai paralajmëroi se kjo rrugë detare do të rihapet “në një mënyrë ose në një tjetër” pasi të përfundojnë operacionet ushtarake kundër Iranit.
“Ngushtica e Hormuzit do të rihapet ose me pëlqimin e Iranit, ose përmes një koalicioni ushtarak ndërkombëtar ku do të përfshihet edhe SHBA,” u shpreh Rubio.
Ai shtoi se objektivat e SHBA-së në Iran janë të qarta dhe se ato pritet të arrihen brenda javësh, jo muajsh. Rubio paralajmëroi gjithashtu se nëse Irani vendos të mbyllë Ngushticën e Hormuzit pas përfundimit të operacionit ushtarak, do të përballet me pasoja të rënda.
