SPAK ka kryer kontrolle në kompleksin Green Coast në dy vila luksoze në pronësi të Ergys Agasit dhe në një vilë në pronësi të Ermal Beqirit. Kontrollet janë bërë me vendim të Gjykatës së Posaçme, në kuadër të hetimeve që po zhvillohen ndaj një grupi kriminal që, sipas SPAK, drejtohet nga Agasi dhe Beqiri, kompanitë e të cilëve dyshohet se kanë zhvatur miliona euro nga tenderat e AKSHI-t.
Burime bëjnë me dije se nga vilat janë sekuestruar dokumente dhe materiale të tjera që dyshohet se mund t’i shërbejnë hetimit.
Sipas SPAK, Agasi dhe Beqiri urdhëronin rrëmbimin e biznesmenëve të ndryshëm me qëllim që t’i detyronin të tërhiqeshin nga garat për tenderat e AKSHI-t.
Gjatë ditës së sotme janë kryer edhe veprime të tjera hetimore që po mbahen top sekret.
Lidhur me skandalin e AKSHI-t ndodhet në masën e arrestit në shtëpi edhe ish-zv.drejtoresha e AKSHI-t, Mirlinda Karçanaj, ndërsa disa të dyshuar të tjerë janë nën masa të tjera sigurie.
