102 kontejnerët me mbetje toksike të kompanisë Kurum po zhvendosen nga Porto Romano në një vendndodhje tjetër. Zhvendosja po kryhet nga Agjencia e Administrimit të Pasurive të Sekuestruara dhe Konfiskuara, pasi vendi ku ishin lënë në ruajtje është pjesë e projektit të Portit të Ri Tregtar të Porto Romanos, i cili aktualisht mbetet vetëm në letër.
Procesi po zhvillohet nën masa të rrepta sigurie, për shkak të rrezikshmërisë së lartë që paraqesin mbetjet.
Kontejnerët u nisën fillimisht drejt Tajlandës, por u kthyen pas pasi Rrjeti i Bazelit ngriti alarmin se mbetjet ishin toksike. Pas hetimeve të Prokurorisë së Durrësit, janë firmosur 35 masa sigurie.
Në kërkim janë shpallur zyrtarë të kompanisë Kurum, si dhe përfaqësues të kompanisë Sokolaj: Gjovana dhe Don Sokolaj, si dhe Oliziana Pemati.
Kontrabanda e mbetjeve konsiderohet një nga skandalet më të mëdha mjedisore të zbuluara deri më sot në vend.
