Tensionet në Ngushticën e Hormuzit janë përshkallëzuar ndjeshëm, ndërsa raportimet e fundit flasin për incidente të rënda mes forcave amerikane dhe atyre iraniane.
Komanda Qendrore e Shteteve te Bashkuara të Amerikës ka deklaruar se ka “eliminuar gjashtë anije iraniane” që, sipas saj, po ndërhynin në lundrimin komercial në zonë. Nga ana tjetër, autoritetet në Iran i kanë cilësuar këto pretendime si “të pavërteta”, duke i mohuar kategorikisht.
Situata u tensionua më tej pasi Teherani njoftoi se kishte goditur me dy raketa një anije të marinës amerikane për të penguar kalimin e saj në ngushticë. Sipas të njëjtave burime, një anije nga Koreja e Jugut është goditur gjithashtu, ndërsa qeveria në Seul ka nisur hetimet për incidentin.
Ndërkohë, Presidenti i SHBA-së, Donald Trump, ka reaguar ashpër, duke paralajmëruar se çdo sulm ndaj një anijeje amerikane do të pasohet me “shkatërrimin” e Iranit.
