Një situatë alarmante shëndetësore është regjistruar në anijen turistike “MV Hondius”, ku një epidemi e dyshuar e lidhur me Hantavirus ka shkaktuar vdekjen e tre personave dhe ka lënë disa të tjerë të sëmurë ose nën vëzhgim si raste të dyshuara.
Anija, në pronësi të kompanisë Oceanwide Expeditions, ishte nisur nga Ushuaia drejt Kepit të Gjelbër, me 149 pasagjerë nga 23 vende të ndryshme. Aktualisht ajo ndodhet e bllokuar pranë Praia, pasi autoritetet lokale nuk kanë dhënë leje për zbarkimin e pasagjerëve nga frika e përhapjes së virusit.
Kriza nisi më 11 prill, kur një pasagjer 70-vjeçar nga Holanda humbi jetën në rrethana të paqarta. Dy javë më vonë, edhe bashkëshortja e tij ndërroi jetë gjatë riatdhesimit. Më 2 maj u regjistrua viktima e tretë, një pasagjer gjerman.
Ndërkohë, një pasagjer britanik ndodhet në gjendje kritike në Afrikën e Jugut pasi rezultoi pozitiv për hantavirus, ndërsa dy anëtarë të ekuipazhit shfaqin simptoma të rënda të frymëmarrjes dhe kërkojnë trajtim urgjent.
Mes frikës dhe pasigurisë, blogeri amerikan i udhëtimeve Jake Rosemarin publikoi një video prekëse në rrjetet sociale, duke kërkuar mirëkuptim nga publiku.
“Ne nuk jemi vetëm një lajm apo tituj kryesorë. Ne jemi njerëz, me familje dhe jetë që na presin”, u shpreh ai, duke theksuar ankthin dhe presionin psikologjik që po përjetojnë pasagjerët.
Autoritetet e Kepit të Gjelbër kanë refuzuar përkohësisht zbarkimin e pasagjerëve, ndërsa rekomandojnë që anija të vazhdojë udhëtimin pa ndalesa. Për shkak të flamurit holandez, Holanda ka marrë përsipër koordinimin konsullor për të gjithë personat në bord, ndërsa po shqyrtohen mundësitë për evakuim mjekësor.
Kompania operuese konfirmoi se po përballet me një “situatë serioze mjekësore”, duke theksuar se çdo vendim varet nga miratimi i autoriteteve lokale.
