Emiratet e Bashkuara Arabe deklarojnë se rezervojnë “të drejtën e plotë dhe legjitime” për t’iu përgjigjur sulmeve iraniane.
Në një reagim zyrtar, Ministria e Jashtme e Emirateve thekson se sulmet me raketa dhe dronë nga Irani përbëjnë një përshkallëzim serioz dhe një kërcënim të drejtpërdrejtë për sigurinë e vendit. Sipas autoriteteve, mbrojtja ajrore ka interceptuar disa raketa dhe dronë mbi territorin e Emirateve, ndërsa në disa zona janë dëgjuar shpërthime të lidhura me neutralizimin e tyre.
Ndërkohë, situata ka ndikuar edhe në jetën civile dhe trafikun ajror. Fluturime drejt Dubait dhe Sharjahut janë pezulluar ose devijuar, ndërsa pranë Dubait është raportuar edhe një zjarr në një anije mallrash, shkaku i të cilit mbetet ende i paqartë.
Deklarata e Emirateve vjen pasi më herët Irani kishte pretenduar se nuk kishte plan të godiste territorin e tyre, duke shtuar kontradiktat mes palëve.
Tensionet në rajon po përhapen edhe më tej. Në Oman, një ndërtesë banimi në veri të vendit është goditur, duke lënë të plagosur lehtë dy shtetas të huaj, sipas agjencisë shtetërore të lajmeve.
