Presidenti i SHBA-së, Donald Trump, ka njoftuar arritjen e një armëpushimi të përkohshëm mes Izraelit dhe Libanit, pas një serie bisedimesh me drejtuesit e të dy vendeve.
Në një postim në rrjetin e tij Truth Social, Trump bëri të ditur se ka komunikuar me presidentin libanez Joseph Aoun dhe kryeministrin izraelit Benjamin Netanyahu, duke theksuar se palët kanë rënë dakord për një armëpushim 10-ditor.
Sipas tij, marrëveshja pritet të hyjë në fuqi në orën 17:00, sipas kohës lindore të SHBA-së, dhe synon të krijojë hapësirë për arritjen e një marrëveshjeje më të gjerë paqeje mes dy vendeve.
Trump bëri të ditur gjithashtu se më herët gjatë javës, përfaqësues të Izraelit dhe Libanit janë takuar në Uashington për herë të parë pas më shumë se 30 vitesh, në praninë e Sekretarit amerikan të Shtetit, Marco Rubio.
Ai shtoi se ka angazhuar zëvendëspresidentin JD Vance, Sekretarin e Shtetit Rubio dhe drejtues të lartë ushtarakë amerikanë për të vijuar përpjekjet diplomatike me qëllim arritjen e një paqeje të qëndrueshme mes palëve.
