Sipas vlerësimeve më të fundit të Eurostat, popullsia e përgjithshme e Bashkimit Evropian pritet të bjerë me 11.7% deri në vitin 2100.
Zyra statistikore e BE-së parashikon, bazuar në të dhënat aktuale demografike, se popullsia e bllokut do të ulet me rreth 53 milionë banorë, duke arritur në 398.8 milionë deri në fund të shekullit.
Sipas projeksioneve, popullsia e BE-së, e cila në vitin 2025 vlerësohet në 451.8 milionë banorë, pritet të arrijë një kulm prej 453.3 milionësh në vitin 2029, përpara se të nisë një rënie të vazhdueshme deri në vitin 2100.
Eurostat thekson gjithashtu se struktura demografike do të ndryshojë ndjeshëm, me rënie të përqindjes së fëmijëve, të rinjve dhe popullsisë në moshë pune.
Grupmosha 0-19 vjeç pritet të ulet nga 20% në 17%, ndërsa personat e moshës 20-64 vjeç nga 58% në 50%.
Në të kundërt, popullsia e moshuar pritet të rritet ndjeshëm. Grupi 65-79 vjeç parashikohet të rritet nga 16% në 17%, ndërsa personat mbi 80 vjeç nga 6% në 16% deri në fund të shekullit.
