Qindra organizata sociale, sindikale dhe shoqërore kanë dalë sot në protestë në Romë, në kuadër të manifestimit “No Kings Italia”, që është pjesë e mobilizimit global të fundjavës me sloganin “Together. Kundër mbretërve dhe luftërave të tyre”.
Nga CGIL dhe Arci deri te Askatasuna, në shesh janë bashkuar qindra realitete të ndryshme. Sipas organizatorëve, në protestë kanë aderuar mbi 700 organizata, mes tyre Emergency, Amnesty International, Rrjeti Italian për Paqen dhe Çarmatimin, Baobab Experience, Action Aid, si dhe lëvizje studentore, grupe pro Palestinës, aktivistë për klimën, aktiviste iraniane, kolektive transfeministe, qendra sociale dhe grupe anarkiste.
Ky front i gjerë dhe i larmishëm synon të sjellë në shesh më shumë se 15 mijë pjesëmarrës, shifër që ishte parashikuar fillimisht nga organizatorët. Protestuesit kanë mbërritur në Romë me autobusë dhe trena nga e gjithë Italia.
Ndërkohë, për mbarëvajtjen e protestës është vendosur një aparat i madh sigurie, me mbi një mijë efektivë policie të angazhuar në kryeqytetin italian.
