Bono krahason deklaratat e Ben-Gvir për banorët e Gazës me retorikën e Heinrich Himmler
Këngëtari i njohur irlandez dhe lideri i grupit U2, Bono, ka kritikuar ministrin izraelit të Sigurisë Kombëtare, Itamar Ben-Gvir, duke krahasuar disa prej deklaratave të tij për banorët e Gazës me retorikën e Heinrich Himmler, një prej drejtuesve kryesorë të regjimit nazist dhe arkitektëve të Holokaustit.
Në një intervistë të gjatë për revistën “Rolling Stone”, të publikuar në kuadër të 50-vjetorit të U2 dhe përpara publikimit të albumit të ri të grupit, Bono kritikoi Ben-Gvir, por edhe kryeministrin izraelit Benjamin Netanyahu. Sipas këngëtarit, Netanyahu e mban Ben-Gvir në qeveri për të ruajtur shumicën e koalicionit të tij.
Gjatë intervistës, Bono iu referua deklaratave që Ben-Gvir kishte bërë për banorët e Gazës gjatë një bisede me Rom Braslavski, një ish-peng izraelit që i mbijetoi robërisë.
“Ka njerëz atje që nuk janë të denjë për të jetuar. Ata nuk kanë nevojë të jetojnë; as njerëz nuk janë”, citohet të ketë thënë Ben-Gvir.
Bono e krahasoi këtë lloj retorike me atë të Heinrich Himmler.
Këngëtari theksoi se vazhdon të mbështesë Izraelin, ndërsa njëkohësisht mbështet edhe të drejtën e palestinezëve për të pasur shtetin e tyre. Duke folur për debatin ndërkombëtar nëse veprimet në Gaza përbëjnë gjenocid, Bono tha se ky është një përcaktim juridik që, sipas tij, duhet të vendoset përfundimisht nga gjykatat ndërkombëtare.
Ai shprehu gjithashtu habinë që Ben-Gvir vazhdon të mbajë post ministror në qeverinë izraelite.
Gjatë intervistës, Bono foli edhe për ndikimin që krijuesit dhe artistët hebrenj kanë pasur në jetën, botëkuptimin dhe muzikën e tij. Ai akuzoi Ben-Gvir se me deklaratat e tij po dëmton imazhin e judaizmit dhe e cilësoi situatën si skandaloze.
Sipas Bono-s, Izraeli duhet t'i adresojë padrejtësitë që ai i lidh me Nakbën përmes një kompromisi politik, pavarësisht kundërshtimeve që mund të ekzistojnë ndaj një zgjidhjeje të tillë. Ai shtoi se drejtësia përbën një vlerë themelore të judaizmit.
Ben-Gvir reagon ndaj Bono-s
Pas intervistës, Ben-Gvir reagoi duke publikuar në platformën X një video muzikore të krijuar me inteligjencë artificiale, të titulluar “Gaza to Ireland”.
Në video shfaqen fëmijë nga Gaza që i drejtohen Bono-s duke i kërkuar ndihmë për të emigruar në Irlandë dhe duke i thënë që të “dëgjojë Ben-Gvirin”. Videoja pretendon gjithashtu se mbi 1.5 milionë banorë të Gazës dëshirojnë të fillojnë një jetë të re në një vend të tretë.
Deklaratat e Bono-s vijnë në një kohë kur këngëtari po promovon këngën “The Tears of Things”, përmes së cilës trajton historinë hebraike dhe luftën në Gaza, duke përdorur ndër të tjera figurën biblike të Davidit dhe statujën e famshme të Mikelanxhelos.
Në intervistë, Bono dënoi sërish sulmin e Hamasit ndaj Izraelit më 7 tetor 2023.
Kjo nuk është hera e parë që lideri i U2 kritikon qeverinë izraelite. Në maj të vitit 2025, gjatë ceremonisë së çmimeve Ivor Novello në Londër, ai kritikoi Netanyahun dhe elementët e ekstremit të djathtë në politikën izraelite, ndërsa njëkohësisht kërkoi që Hamasi të lironte pengjet dhe t'i jepej fund luftës.
