Kreu i Partisë Demokratike, Sali Berisha, ka reaguar për vrasjen e 20-vjeçarit portugez Luis Miguel Varela Mendes në Ksamil, duke ngritur akuza të forta ndaj qeverisë për situatën e sigurisë dhe kriminalitetit në zonën turistike të Sarandës.
Gjatë një deklarate për mediat, Berisha e cilësoi ngjarjen si një akt “pothuajse vrasje shtetërore”, duke sqaruar se me këtë deklaratë nuk pretendon se turisti është vrarë nga persona me uniformë, por se, sipas tij, krimi ka depërtuar thellë në industrinë turistike të zonës.
“Vrasja e 20-vjeçarit portugez, turist në Ksamil, është një akt sipas të dhënave, pothuaj vrasje shtetërore. E them këtë në kuptimin, jo se ai u ekzekutua nga njerëz me uniformë, por në kuptimin e vërtetë se industria turistike në Sarandë është në kthetrat e krimit”, deklaroi Berisha.
Kreu i PD-së vijoi akuzat, duke pretenduar se në Sarandë kufijtë mes shtetit dhe krimit janë zbehur dhe se ligji nuk funksionon.
“Në Sarandë, shteti dhe krimi janë një. Ligji nuk ekziston”, tha Berisha, ndërsa ngriti akuza edhe për aktivitetet e paligjshme që, sipas tij, zhvillohen në zonë, përfshirë trafikun e drogës dhe atë të qenieve njerëzore.
Berisha u ndal gjithashtu te lokalet e natës dhe menaxhimi i plazheve, duke pretenduar se një pjesë e tyre kontrollohen nga persona të lidhur me botën e krimit.
