“Në kushte të tilla unë do të jepja dorëheqjen” Ishte kjo deklarata e Baton Haxhiut e cila do të quhej e pafalshme nga Veliaj dhe do të sillte përplasje mes analistit dhe kreut të Bashkisë Tiranë, Veliaj.
Pas skandalit për aferën "5D" në bashkinë Tiranë, i ftuar në emisionin Çim Peka live, analisti Baton Haxhiu tha se kjo nuk është më një çështje politike por një çështje morale dhe kur në momentin që janë tetë drejtorë të bashkisë në burg nuk ke moral që të qëndrosh më në krye të bashkisë.
Erjon Veliaj pasi dëshmoi në SPAK për 7 orë, edhe pse doli me shume "lumturi " , inatin e fshehur ua zbrazi analistëve. Gjatë fjalimit të mbajtur në Këshillin Bashkiak, Veliaj pa i përmendur emrin, por duke lënë për ta kuptuar sulmoi dhe Baton Haxhiun.
"Mjafton të shikoje dje emisionet e lajmeve, dhe ti kupton se një nga meritat tona është se kemi mbledhur si armiq bashkë të gjithë llumin. Secili prej analistëve, ka kërkuar diçka në bashkinë e Tiranës. E di ai çfarë ka kërkuar Ben Reli për atë portalin që nuk jepet leje në kopshtin zoologjik. E di ai tjetri çfarë ka kërkuar për sondazhet që nuk I bën dhe faturon shifra të panevojshme dhe kur nuk e duan në Kosovë, në Shqipëri nuk e duan aspak. " deklaroi Veliaj
Përgjigjen Veliajt nuk ia kurseu analisti i cili dhe tashmë edhe duke e argumentuar deklaroi se Veliaj duhet të tërhiqet.
Baton Haxhiu shkruan
Nëse ‘Lali’ në majë të skemave kriminale mendon se unë duhet ta kursej nga kërkesa dorëheqje edhe në kushte kur tërë të emëruarit e tij janë përfshirë në hetim mëse të merituar kriminal, atëherë ai nuk është thjeshtë gabim, sepse shembulli i punës sime për tridhjetë vite në gazetari dhe angazhime publike tregon krejtësisht të kundërtën.
Po ashtu, gënjeshtra e tij se unë i paskam kërkuar ‘sondazhe’ me çmime të ‘panevojshme’ nuk shpërfaq thjeshtë brendësinë e një njeriu paskrupuj dhe mashtruesi.
Fundja, unë me Erion Veliajn kam bërë vetëm biseda shumë sipërfaqësore në gjithsej dy apo tre takime për tërë jetën time, sepse mungesa e personalitetit moral dhe cektësia e tij politike kanë shkaktuar brenda meje vazhdimisht një dëshirë të papërmbajtshme për të qëndruar sa më larg tij.
Në fakt, dorëheqja është më e pakta sepse në një rrethanë normale do ishe prej kohësh i mbyllur në një hapësirë të ngushtë pas grilash.
Opinionistit Baton Haxhiu nuk i del e keqja dhe ka vijuar sulmet në emisionin Opinion ku ka krahasuar Veliajn me historitë e mafies siçiliane.
Pas këtij "sherri" ka reaguar dhe analisti Andi Bushati duke e quajtur veten dëshmitarë të nisjes së përplasjeve.
Bushati shkruan:
“Në kushte të tilla unë do të jepja dorëheqjen”, guxoi të thotë Batoni. Ai nuk e akuzoi Erionin si vjedhës, as tha e meriton burgun, as pretendoi se ka prova kundër tij. Madje, madje, as i kërkoi që të ikte. Këtë e la thjesht në moralin e tij. Dhe ky qe krimi i madh që bëri.
Kur doli nga Prokuroria e Posaçme, Veliaj e futi edhe Haxhiun në listën e “llumit”, “interesaxhijve”, “maskarenjve”, të cilën e kishte përpiluar vetë. Dhe pse? Pasi siç shpjegoi, kishte parë një natë më parë debatet politike. Pikërisht atë ku Batoni nuk e konsideroi dorëheqjen si një sakrilegj.
Duke marrë parasysh që Baton Haxhiu njihet si gazetar mbështetës i Edi Ramës dhe qeverisë së tij, Andi Bushati ngren pyetjen
A nuk përçonte kjo mesazhin se ai po braktiset edhe nga krahu i tij? A nuk i rikujtonte kjo njerëzve faktin se, që kur i kanë rënë në burg drejtorët, askush nga ish-përkrahësit publikë, nuk përbetohet më me zë të lartë për ndershmërinë, profesionalizmin, apo zotësinë e Lalit?
Edhe pse mbështetës i forcës së tij politike, Haxhiu që i thur lavde Ramës nuk e honeps dot Veliajn. Kujtojmë dhe zgjedhjet e fundit për bashkitë, ku Haxhiu deklaronte me bindje se PS dhe Edi Rama fitonte zgjedhjet, ndërsa për Erjon Veliajn deklaronte
“Erion Veliaj ka falsitet dhe probleme me karakterin. Nuk e votoj më 14 maj. Ka shkatërruar estetikisht qytetin.
Ditën që Veliaj dëshmonte në SPAK, kryeministri Rama shijonte bukuritë e Thethit. Çudi ishte mos prania e kreut të bashkisë Veliaj në Konferencën për Turizmin pak ditë më parë, ku ishin të pranishëm ministra dhe kryetarë bashkie. Tashmë Veliajt i vjen dhe sulmi nga një prej analistëve më pranë Ramës.
Duke e quajtur Haxhiun si "njeri" i Ramës me informacione të brendshme , (mbase shkaku i sulmit) dhe duke parë largësinë që kryeministri ka vendosur me Veliajn së fundmi mund të dëgjojmë së shpejti Edi Ramën me frazën
" Në raport me ligjin përgjegjësia është personale"
Dhe siç e dimë të gjithë, historia përsëritet…
