Bashkëpunëtori i drejtësisë Artan Tafani është paraqitur për herë të dytë përpara togave të zeza të Gjykatës së Posaçme, duke dhënë detaje tronditëse mbi vrasjen e Albi Bashaliut. Në vijim të dëshmisë së dhënë një javë më parë, Tafani ka zbardhur mekanizmin e ngjarjes dhe ndarjen e parave të krimit.
Sipas rrëfimit të tij, pasi krimi ishte kryer, autorët hasën vështirësi gjatë largimit. “Pasi mbaruam punë, nuk na ndizej makina. E dogjëm makinën. Te vendi ku kishim lënë makinën tjetër për t’u larguar, fshiva timonin që e kisha prekur. U nisa me vrap drejt rrugës kryesore”, tha Tafani.
Ai tregoi më tej se pas vrasjes, ata udhëtuan drejt Tiranës, ku lanë makinën tjetër në zonën e Astirit për të shmangur kontrollet. “Donim të shmangeshim nëpër lagje, ecëm në këmbë. Makinën e lamë te rrethrrotullimi i Astirit”, u shpreh Tafani.
Pjesa më e rëndë e dëshmisë lidhet me shpërblimin për krimin. Tafani deklaroi se për vrasjen e Bashaliut u paguan 60 mijë euro. “Fillimisht morëm 30 mijë euro. Mos gaboj, lekët m’i dha babai i Laertit, Qamili. Unë mora 20 mijë euro, 20 mijë i mori Lulzimi, ndërsa 10 mijë Laerti. Morëm dy herë nga 10 mijë euro”, sqaroi ai.
Artan Tafani – Dëshmia para SPAK:
SPAK: Si ta ka prezantuar viktimën Laerti?
Tafani: Më tha që këtë punë duhet ta bënim për Lorenc Lalën. Viktima, Albi Bashaliu, ishte mik i Laertit. Babai i Albit kishte vrarë babain e Lorencit në burg. Pas një komunikimi që bëri Laerti me ta, Enriko na dërgoi një video të një Volkswageni që përdorte viktima. Albi shiste pula. Enriko kishte një Mini Cooper. Laerti na tregoi se çfarë kishte veshur viktima kur ndodhej në Rrogozhinë, por më pas na udhëzoi të shkonim në fshatin Gjonçaj, ku jetonte viktima, sepse atje do të kryhej vrasja.
SPAK: A e njihje emrin Lorenc Lala?
Tafani: Po, ishte emër i njohur. Lili është krahu i djathtë i Saimir Taullaut. Vëllai i tij ishte vrarë nga banda e Aldo Bares. Lili qëndronte gjithmonë pranë Saimirit dhe mbante paratë për të, për Laertin dhe për Saimirin.
Makina që përdorëm për vrasjen ishte një Audi e bardhë, e drejtonte Lulzimi. Unë kisha një Benz, por më vonë mora Audin, ndërsa Benzin gri e lamë më larg, afër një dyqani lulesh që ta kishim në dispozicion. Ishte ora 4 e mëngjesit. I thashë rojes që do e lija aty deri në orën 8 sepse kisha punë. Ai më tha: “Po, s’ka problem.”
Pastaj u nisëm për në Gjonçaj, vetëm 10 metra larg lokalit ku ndodhej viktima. Aty u krye vrasja. Audin e bardhë e kishte sjellë Ligor Romaçka dhe targat i kishte siguruar Lulzimi.
Tafani: Kishim armë me silenciator, të cilën ma dha Bledar Berberi. Kishim dy armë – një TT dhe një tjetër me fishekë shumë të vegjël. Por vetëm një funksionoi, tjetra jo. Njërën e kisha unë, tjetrën Lulzimi. Më kujtohet që unë kam qëlluar katër herë: dy herë në gjoks dhe dy herë në shpatull. Në total janë qëlluar 6 fishekë. Arma ishte personale e Bledar Berberit.
Prokurori: Po makina Benz nga ishte siguruar?
Tafani: Makina Benz ishte me targa greke. Përdorej në Shqipëri nga e dashura e Erisjanos. Më pas u mor nga Laerti dhe e mbajtëm ne. Më vonë, Laerti e dërgoi makinën në Greqi.
