33-vjeçari, Klisman Harumi është arrestuar nga Policia e Kavajës, pasi dyshohet si autor i disa vjedhjeve të kryera në banesa në qytetin e Kavajës dhe në fshatin Synej, gjatë periudhës gusht 2024 – shkurt 2025.
Sipas njoftimit zyrtar, hetimet e kryera kanë zbuluar se Harumi ka qenë i përfshirë në të paktën tre raste vjedhjesh, ku ka marrë pajisje elektronike dhe sende të tjera me vlerë.
Gjatë kontrollit në banesën e të arrestuarit, policia ka sekuestruar disa nga sendet e vjedhura, një sasi lënde narkotike e dyshuar si Cannabis Sativa, si edhe veshje që dyshohet se janë përdorur gjatë kryerjes së vjedhjeve.
Autoritetet deklarojnë se vijojnë hetimet për të identifikuar raste të tjera ku mund të jetë i përfshirë 33-vjeçari. Ndërkohë, materialet procedurale i janë referuar Prokurorisë së Durrësit për veprime të mëtejshme ligjore.
