Në kuadër të shqyrtimit të dosjes “Plumbi i Artë”, Gjykata e Posaçme Kundër Krimit të Organizuar dhe Korrupsionit ka nisur dëgjimin e dëshmisë së bashkëpunëtorit të drejtësisë, Erion Alibej.
Sipas Prokurorisë së Posaçme (SPAK), Alibej akuzohet për vrasjen e Dorian Shkozës dhe Anxhelo Avdisë, si dhe për vrasjen e vëllezërve Besmir dhe Viktor Haxhia, Emiliano Ramazanit dhe Rigers Runajt.
Gjatë seancës, prokurorët e pyetën Alibejt për njohjen e tij me bashkëpunëtorët e tjerë të drejtësisë, Nuredin Dumanin dhe Skerdi Tasin.
Alibej deklaroi se Nuredin Dumanin e ka njohur pas lirimit nga paraburgimi i Elbasanit në fillim të vitit 2020. Ai tha se ditën që u lirua, ka komunikuar me Arjan Spahiun, i cili kishte një kontakt me emrin “Fati” ose “Fat Katnari”. Gjithashtu, Alibej tregoi se ishte përdorues i aplikacioneve të koduara EncroChat dhe Skyecc, ndërsa në atë periudhë ndodhej në një moment të vështirë për shkak të atentateve që ishin kryer ndaj familjes së tij.
Ai tha se Arjani kishte ardhur në Shqipëri dhe i kishte thënë se po flitej për Dumanin, i cili kishte dashur ta takonte Alibejt.
Në deklaratë, Alibej theksoi se kishte lënë të kuptohej se për Talo Çelën ofronte 100 mijë euro për ta vrarë dhe 200 mijë euro për ta sjellë të gjallë.
Ai vazhdoi duke thënë se kishte organizuar një takim me Nuredin Dumanin, duke i dhënë një makinë Arjanit – një Mercedes C-Class i zi – që të shkonte dhe të merrte Nuredinin në zonën e Katundit të Ri. Takimi u zhvillua në mbrëmje, në një pallat ku Alibej jetonte, në dy kate më poshtë banesës së tij, ku qëndronin kushërinjtë, pasi ai vetë ishte i ngujuar për shkak të rreziqeve.
Takimi zgjati dy orë e 48 minuta dhe u regjistrua i plotë nga Alibej. Ai tha se kishte dëgjuar gjithë bisedën dhe kishte mbledhur prova, foto dhe adresa për Nuredin Dumanin.
Ky dëshmi pritet të hedhë dritë mbi lidhjet dhe rolet e aktorëve të përfshirë në këtë dosje të rëndësishme kriminale, duke ndriçuar një rrjet të gjerë marrëdhëniesh dhe veprimesh kriminale që po hetohen nga autoritetet.
Seanca vijon dhe priten detaje të tjera të rëndësishme nga dëshmia e bashkëpunëtorit të drejtësisë Erion Alibej.
