Policia ka arrestuar dy persona dhe ka shpallur në kërkim një tjetër, pas një operacioni të suksesshëm në Luz të Fushë Krujës, ku u kapën duke transportuar lëndë narkotike.
Të arrestuarit janë Kujtim Ukaj, 35 vjeç, banues në Krujë, dhe Abdurrahman Rizvani, 26 vjeç, banues në Mat. Ndërkohë, bashkëpunëtori i tyre, S. D., 28 vjeç, është shpallur në kërkim.
Gjatë kontrolleve të ushtruara në dy automjetet e ndaluara, autoritetet gjetën dhe sekuestruan 6 thasë me kanabis sativa, me peshë totale 60 kilogramë. Sasia e lëndës narkotike u zbulua në bagazhin e makinës së drejtuar nga Kujtim Ukaj.
Policia njofton se automjeti tjetër, i drejtuar nga Abdurrahman Rizvani, kishte për detyrë të kontrollonte rrugën dhe të informonte Ukajn nëse kishte prezencë të policisë.
Të arrestuarve iu sekuestruan gjithashtu dy automjete, dy celularë dhe një shumë parash në cilësinë e provave materiale. Të dy personat janë shoqëruar për veprime të mëtejshme procedurale, ndërsa vijojnë hetimet për kapjen e personit të tretë në kërkim.
