Drejtuesi i SPAK-ut, Altin Dumani, deklaroi se ish-deputeti Jurgis Çyrbja është një nga politikanët e arrestuar në bazë të komunikimeve në aplikacionin Sky ECC. Ai theksoi se institucioni po punon për të ndarë provat nga thashethemet, duke qëndruar objektiv dhe duke kërkuar prova shtesë përtej komunikimeve. Dumani konfirmoi gjithashtu se po pritet vendimi i arsyetuar i Gjykatës Kushtetuese për çështjene e sky ecc, ndërsa garantoi se çdo vendim do të merret sapo të sigurohen prova të mjaftueshme.
"Ne nuk kemi në dispozicion të gjithë databazën e Sky ECC dhe vazhdojmë të kërkojmë kode të tjera që mund të dalin gjatë hetimeve tona. Deri më tani, rezultatet nuk kanë treguar ndonjë lidhje direkte. Si institucion, jemi të kujdesshëm për të ndarë provat nga thashethemet, duke synuar të jemi sa më objektivë. Aktualisht, kemi një vendim të Gjykatës Kushtetuese për këtë çështje dhe jemi në pritje të vendimit të arsyetuar për të shqyrtuar argumentet. Përpiqemi të mos mbështetemi vetëm te komunikimet në Sky ECC, por t’i lidhim ato me prova të tjera." tha Dumani
