Kapiteni i Kombëtares së Kosovës, Amir Rrahmani, ka kërkuar nga UEFA të ndërhyjë për të mbrojtur futbollistët nga sjelljet raciste dhe thirrjet fyese gjatë ndeshjeve. Deklarata e Rrahmanit erdhi pas ndërprerjes së ndeshjes në Bukuresht, ku ai përshkroi atmosferën e rënduar të krijuar nga tifozët vendas.
“Në stadium kishte thirrje të vazhdueshme ‘Serbia, Kosova’ që zgjatën për 90 minuta. Në minutat shtesë nisën thirrje të tjera që nuk dua t’i përsëris, sepse është turp,” tha Rrahmani. Ai bëri përpjekje të shumta për t’i tërhequr vëmendjen gjyqtarit për këto thirrje, por pa sukses. “Tri herë i kërkova gjyqtarit të reagojë, por nuk bëri asgjë. Në fund, i thashë se ne do të dilnim nga fusha nëse situata do të vazhdonte kështu.”
Kapiteni i Kosovës gjithashtu theksoi se tifozët filluan me thirrje më të ashpra dhe provokuese pasi skuadra e tyre u përpoq të shmangte incidentet. “UEFA duhet të vendosë për të ndaluar këto sjellje. Ne jemi këtu për të përfaqësuar popullin dhe shtetin tonë, që ka kaluar një histori të dhimbshme dhe të rëndë. Nuk mund të tolerojmë të tilla thirrje,” shtoi ai.
Në përfundim, Rrahmani dërgoi një mesazh të qartë: “Kosova është Kosovë ose Kosova është Shqipëri. Këtu mbaron gjithçka.”
