Shqipëria do të presë nesër Çekinë në stadiumin "Arena Kombëtare" në Tiranë, në kuadër të Ligës së Kombeve, me ndeshjen që do të zhvillohet në orën 20:45. Ky takim është shumë i rëndësishëm për Grupin B1 dhe mund të përcaktojë fatet e kualifikimit.
Në prag të ndeshjes, trajneri i Kombëtares shqiptare, Silvinjo, shprehu optimizëm dhe theksoi rëndësinë e një performance të plotë dhe pa kompromis. Ai e cilësoi përballjen me Çekinë si një sfidë të vështirë, ku skuadra duhet të japë maksimumin për të arritur sukses. "E kemi thënë që është një grup shumë i vështirë, nëse nuk është më i vështiri, është mes tyre. Duhet të shkojmë në fushë në 100%. Kemi shanse të mira nëse japim 100%," tha trajneri brazilian.
Silvinjo u ndal edhe te strategjia e ekipit kundërshtar, duke theksuar se Çekia është një skuadër fizike dhe të fortë, me lojtarë të talentuar si Shulc, Çeri dhe Provod. Ai shprehu besim te cilësitë teknike dhe taktike të Shqipërisë, duke shtuar se është e rëndësishme që skuadra të hyjë në fushë me shumë zemër dhe shpirt.
Sa i përket formacionit, Silvinjo tha se ka disa mundësi për të zgjedhur, duke përmendur Uzunin, i cili është një lojtar i rëndësishëm në sulm, megjithëse jo një sulmues tipik. Trajneri brazilian tha gjithashtu se do të bëhet një vlerësim pas stërvitjes për të parë gjendjen e disa lojtarëve që kanë pasur probleme fizike.
Në lidhje me mentalitetin e skuadrës, Silvinjo theksoi se lojtaret janë të gatshëm të japin gjithçka dhe se nuk kanë frikë nga kundërshtari. "Nuk ka frikë nga kundërshtarit apo ndeshjes, hyjmë në fushë për 100%," u shpreh ai.
Një tjetër aspekt që trajneri brazilian vuri në dukje ishte rëndësia e reagimit të skuadrës pas një goli të pësuar. Ai theksoi se eksperienca dhe përqendrimi janë çelës për të kaluar momentet e vështira dhe për të rikuperuar lojën.
Me një stadium që pritet të jetë plot me tifozë, Shqipëria do të kërkojë të fitojë për të forcuar shanset e saj për kalimin në fazën tjetër të Ligës së Kombeve.
