Armando Broja nuk mori pjesë as në grumbullimin e fundit të Kombëtares shqiptare për ndeshjet e nëntorit në Ligën e Kombeve. Sulmuesi, që ende nuk është rikthyer në stërvitjen e plotë me Evertonin, pritet të jetë së shpejti në gjendje për të luajtur me skuadrën e tij, sipas trajnerit të klubit anglez, Sean Dyche.
Në një konferencë për shtyp, trajneri i Evertonit ka sqaruar se Broja ka filluar një proces të ngadaltë integrimi në stërvitje pas rikthimit nga dëmtimi. Dyche theksoi se për momentin Broja po merr pjesë vetëm në disa seanca të lehta, për të rifituar ndjesinë e topit, ndërsa rikuperimi i tij ka ecur mirë nën mbikëqyrjen e stafit mjekësor.
“Ai ka marrë pjesë në disa pjesë të stërvitjes, por është ende në fazën e rikuperimit. Kjo është më shumë për të pasur një ndjesi të topit dhe për t'u njohur me lojtarët, pasi ai erdhi i dëmtuar. Ka punuar shumë dhe ka bërë përpjekje të jashtëzakonshme për t'u rikthyer në formën e tij fizike. Ky është një hap i parë, për t'i mundësuar të jetë afër lojtarëve në fushë”, u shpreh Dyche.
Dyche shpreson që pas pauzës ndërkombëtare, Broja të jetë më afër rikthimit të plotë në stërvitje dhe të jetë gati për të kontribuar me skuadrën e tij.
