Një ambulancë është bllokuar sot në oborrin e Qendrës Spitalore Universitare “Nënë Tereza”, mes trafikut të rënduar dhe automjeteve që lëvizin në ambientet e spitalit më të madh të vendit.
Ngjarja vjen vetëm një ditë pasi ministrja e Shëndetësisë, Evis Sala, publikoi një video ku promovonte rikonstruksionin e urgjencës së QSUT-së, duke folur për investimet dhe përmirësimin e shërbimeve shëndetësore.
Por ndërsa në rrjetet sociale servirej imazhi i një urgjence moderne, në terren një ambulancë nuk arrinte të lëvizte normalisht në oborrin e spitalit. Pamja krijon një kontrast të fortë mes propagandës së institucioneve dhe realitetit që përballin çdo ditë pacientët, familjarët dhe personeli mjekësor.
Në një kohë kur ministria flet për modernizim, teknologji dhe transformim të shërbimit, një ambulancë e bllokuar në hyrje të spitalit ngre pyetjen më të thjeshtë: çfarë vlere kanë videot promocionale kur urgjenca ngec në trafik para se të mbërrijë te pacienti? Për shumë qytetarë, kjo pamje ishte një përgjigje më bindëse se çdo video e zonjës Sala.
