Gjykata e Posaçme pritet të shpallë më datë 16 prill vendimin për të pandehurit e aferës së inceneratorit të Tiranës.
Në seancën e sotme, avokati Ermir Beta, që mbron interesat e të pandehurit Namik Simixhiu, kërkoi që ai të shpallet i pafajshëm.
“Mbahet 2 vite në burg një 68-vjeçar, me një veshkë. Vuan nga disa sëmundje. Në këto rrethana ai e kishte të vështirë të ishte dhe sot këtu para gjykatës”, tha Beta. Avokati i dorëzoi gjykatës letrën e firmosur nga Namik Simixhiu që këmbëngulte për pafajësi.
Në fillim të shkurtit, SPAK shpalli pretencën për 8 të pandehurit për aferën e inceneratorit të Tiranës. Për ish-ministrin e Mjedisit u kërkua dënimi me 4 vite burgim për akuzën e “shpërdorimit të detyrës” kryer në bashkëpunim.
Për të pandehurit Bledar Karolli, Fatjon Murati dhe ish-zyrtarët e Bashkisë, Taulant Tusha dhe Namik Simixhiu, u kërkua dënimi me nga 4 vite burgim secili. Për Valbona Ballgjinin dhe Sidita Koplikun, SPAK kërkoi dënimin me 4 vite shërbim prove, ndërsa për Jetmir Llapajn u kërkua dënimi me 2 vite burgim.
Të gjithë të pandehurit përfitojnë ulje të një të tretës së dënimit nëse shpallen fajtorë, ndërsa iu ndalohet e drejta për të ushtruar funksione publike për 5 vite.
SPAK ka shpallur ndërkohë në kërkim pronarët faktikë të inceneratorit, biznesmenët Mirel Mërtiri e Klodian Zoto, të cilët akuzohen për korrupsion e pastrim parash
