SPAK ka reaguar në lidhje me ngjarjen e pazakontë të ditës së sotme ku një qytetar u vetëhelmua me fostoksinë jashtë dyerve të këtij institucioni. Në reagim e SPAK thuhet se qytetari është paraqitur tek oficeri i informacionit dhe ka kërkuar takim me një nga hetuesit e BKH-së për një çështje e cila pas verifikimeve ka rezultuar se i ka kaluar për kompetencë një prokurorie të juridiksionit të përgjithshëm që në vitin 2022.
Sipas Prokurorisë së Posaçme, oficeri i informacionit ka bërë me dije qytetarin të presë sa të njoftojë hetuesin e çështjes mbi kërkesën e tij, ndërsa qytetari ka dalë jashtë në oborr, duke mos u kthyer për të marrë përgjigje.
Kujtojmë se Pal Trashaj, është viktimë e skandalit të mikrokredive, pasi dyshohet se ka humbur disa pasuri. Ditën e sotme 63-vjeçari ka qenë jashtë ambienteve të SPAK ndërsa është vetëhelmuar me fostoksinë. Menjëherë aty ka mbërritur ambulanca duke e transportuar për në spital, ndërsa ndodhet në gjendje të rëndë nën kujdesin e mjekëve.
Më poshtë reagimi i plotë i SPAK:
Në lidhje me incidentin e sotëm të qytetarit Pal Trashaj të ndodhur jashtë Prokurorisë së Posaçme, institucioni ynë i uron z. Trashaj shërim të shpejtë! Sqarojmë se qytetari në fjalë është paraqitur tek oficeri i informacionit dhe ka kërkuar takim me një nga hetuesit e BKH-së për një çështje e cila pas verifikimeve ka rezultuar se i ka kaluar për kompetencë një prokurorie të juridiksionit të përgjithshëm që në vitin 2022. Më pas oficeri i informacionit ka bërë me dije qytetarin të presë sa të njoftojë hetuesin e çështjes mbi kërkesën e tij. Ndërkohë që oficeri i informacionit ka marrë kontakt me hetuesin e çështjes, qytetari ka dalë jashtë në oborr, duke mos ardhur për të marrë përgjigje.
Pas disa orësh, jashtë ambjenteve të SPAK, janë parë shërbimet spitalore të urgjencës dhe aty është mësuar rreth veprimit të ndërmarrë nga z. Trashaj.
Institucioni ynë ka bërë menjëherë verifikimet rreth këtij incidenti për të sqaruar çdo veprim të punonjësve të tij.
Prokuroria e Posaçme, garanton se do t’i përgjigjet në kohë çdo qytetari me korrektësi dhe në zbatim të ligjit për çështje që janë në kompetencën e saj.
