Situata nga zjarri në Milot është përkeqësuar gjatë minutave të fundit, ndërsa flakët janë afruar ndjeshëm pranë disa banesave, duke rritur rrezikun për zonat e banuara.
Operacioni për izolimin dhe shuarjen e zjarrit vijon si nga toka, ashtu edhe nga ajri. Dy helikopterë janë angazhuar në ndërhyrje, ndërsa në terren ndodhen rreth 20 efektivë të Forcave të Armatosura, së bashku me ekipet zjarrfikëse të Kurbinit, Lezhës, Kamzës dhe Vorës.
Puna e forcave vështirësohet nga terreni dhe dendësia e pyllit me pisha. Bimësia favorizon përhapjen e shpejtë të flakëve, ndërsa në disa zona ndërhyrja nga toka paraqitet e vështirë.
Forcat e angazhuara po përqendrojnë përpjekjet në izolimin e vatrave aktive dhe krijimin e një perimetri sigurie, me synim frenimin e avancimit të zjarrit drejt banesave.
Operacioni vijon, ndërsa situata mbetet nën monitorim të vazhdueshëm.
