Me vendim gjykate është kontrolluar banesa e Donald Neles, i njohur me pseudonimin “Tupja”, dhe banesa të tjera në kuadër të hetimeve që po kryhen për zhdukjen e Eraldo Muçit, mikut të besuar të Aleksandër Sadikaj, i njohur si Sanco, ky i fundit i ekzekutuar me shpërthim eksplozivi në qershor të 2022 tek rrethrrotullimi i TEG-ut në Tiranë. Banesat janë kontrolluar me vendim gjykate në kërkim të provave që mund të hedhin dritë mbi zhdukjen e 30-vjeçarit.
Tupja mendohet të jetë kontakti i fundit me Muçin, e për këtë arsye është shoqëruar e marrë në pyetje, ndërsa i është ushtruar kontroll edhe në banesën e tij.
Eraldo Muçi rezulton i zhdukur pa gjurmë prej 15 qershorit 2025. Ai doli nga banesa e tij në fshatin Bylysh të Memaliajt dhe pasi u ndal te “Sanco Farm”, ku mori lekë borxh, udhëtoi drejt Durrësit. Në autostradën Tiranë-Durrës është parë për herë të fundit po atë ditë dhe prej atij momenti nuk dihet çfarë ka ndodhur me të.
Hetuesit dyshojnë se ndodhen përpara një ngjarjeje kriminale për motive hakmarrjeje, pasi Eraldo Muçi njihej si një prej njerëzve të besuar të Sadikajt.
