Ukraina dhe Turqia kanë rënë dakord të bashkëpunojnë për krijimin dhe funksionimin e një korridori të ri për transportin e drithërave në Detin e Zi. Marrëveshja u arrit gjatë takimit në Stamboll mes presidentit ukrainas, Volodymyr Zelensky, dhe homologut të tij turk, Recep Tayyip Erdogan.
Lajmin e bëri të ditur vetë Zelensky gjatë konferencës së përbashkët për shtyp pas takimit me liderin turk. “Sot, arrita një marrëveshje me Presidentin Erdogan për të punuar në korridorin e grurit të Detit të Zi”, deklaroi presidenti ukrainas, duke theksuar se synimi është që ky korridor të jetë funksional dhe të garantojë transportin e sigurt detar.
Zelensky vlerësoi mbështetjen e Ankarasë për përpjekjet e Ukrainës në garantimin e lundrimit të sigurt në Detin e Zi dhe rikthimin e kushteve normale të jetesës në rajon. Çështja e sigurisë detare ishte një nga temat kryesore të diskutimit mes dy presidentëve, në një kohë kur sulmet dhe përshkallëzimi i konfliktit kanë shtuar shqetësimet për lëvizjen e anijeve tregtare.
Nga ana e tij, Erdogan paralajmëroi se sulmet ndaj anijeve civile në Detin e Zi nuk i shërbejnë askujt dhe se Turqia është e gatshme të vijojë përpjekjet diplomatike për të ulur tensionet mes palëve.
Korridori i drithërave ka rëndësi strategjike për Ukrainën, një prej eksportuesve të rëndësishëm të produkteve bujqësore në tregjet ndërkombëtare. Një mekanizëm i tillë ishte krijuar në vitin 2022 me ndërmjetësimin e Turqisë dhe Kombeve të Bashkuara, por Rusia u tërhoq nga marrëveshja në korrik të vitit 2023.
Marrëveshja e fundit mes Zelenskyt dhe Erdoganit synon të rikthejë bashkëpunimin për transportin detar të produkteve bujqësore, por nuk nënkupton ende një marrëveshje të re me Rusinë apo rifillimin automatik të mekanizmit të mëparshëm.
