Një vendim i fundit i qeverisë i kalon kompetencat e vlerësimit të hoteleve, dhënien e yjeve nga ministria e Turizmit, aktualisht drejtuar nga znj. Mirela Kumbaro. Pra, klasifikimi i strukturave akomoduese me 4 dhe 5 yje me Vendimin nr 730 të datës 4 Qershor të Këshillit të Ministrave do të bëhet nga Ministria, pa përfshirjen e një agjencie të pavarur dhe ndërkombëtare vlerësimi, siç e parashikon ligji që prej gati një dekade.
Në reagimin e tyre, Qëndresa Qytetare vlerëson se ky vendim ngre shqetësime serioze për mungesë transparence, kritere të paqarta dhe mundësi për abuzim, siç koha ka treguar në të shkuarën.
"Një tjetër pyetje që shtrohet është se përse është ky nxitim i qeverisë për të klasifikuar struktura akomoduese, pikërisht tani kur një tjetër vendim kërkon që kazinotë të hapen vetëm në hotele me 5 yje?
Si është e mundur që pikërisht për këtë çështje të rëndësishme, siç është klasifikimi i strukturave turistike, qeveria nuk arrin dot të kontraktojë një agjenci ndërkombëtare?"-shkruhet në reagimin e tyre.
Sipas aktivistëve, në një kohë kur qeveria mburret me arkitektët se për çdo kullë në Tiranë dhe për çdo investim mbi 8 kate pranë vijës së detit dhe investim strategjik kërkohet një studio ndërkombëtare arkitekturore atëherë pse dëshmohet të kontraktohet një agjenci akreditimi që të përcaktojë dhe standardet e hoteleve?
E megjithatë, për të kontraktuar një agjenci të huaj që të bëjë një vlerësim objektiv e të pavarur, papritur nuk ka kohë, nuk ka mundësi, dhe mjafton Ministria?!
Qëndresa Qytetare vlerëson se Ministria e Turizmit nuk ka kapacitete dhe as ekspertizën për ta bërë klasifikimin e hoteleve duke rrezikuar abuzimin dhe informalitetin në tregun që tashme ka peshën kryesore ne ekonomi.
Ndaj dhe në fund ngrihen dyshime se kjo kompetence e re e Ministres Mirela Kumbaro mund të rezultojë një kriter i lehtë për të gjithë ata që aspirojnë licensë lojërash fati dhe hotelesh me 5 yje.
