Regjisori Namik Ajazi ka pranuar se në burgun e Spaçit po zhvillohen punime që synojnë tjetërsimin e tij. Në një intervistë për TVSH, ai deklaroi se kjo ndodh për shkak të mungesës së fondeve të mjaftueshme për realizimin e filmit në mënyra alternative.
“Jemi të detyruar të shkojmë tek realizmi sepse nuk kemi mënyra të tjera,” – u shpreh regjisori, duke theksuar se ndërtimi i një dekori të ri do të kishte kosto të papërballueshme, jo vetëm për produksionet shqiptare, por edhe për ato europiane.
“Ajo që e thotë me të drejtë Fatosi dhe e thotë edhe ndonjë kolegu im, që ka bërë një koment në Facebook, thotë ‘Pse nuk bëjnë një dekor?’. Si mund të bëjnë dekor?! E dini çfarë kostosh ka një dekor apo jo?! Ka kosto të papërballueshme, jo nga ne kur japim 200 mijë euro për të bërë një film artistik, por edhe nga produksionet e mëdha europiane është e vështirë të bëhet,” – shtoi Ajazi.
Regjisori zbuloi gjithashtu se ka pasur një takim me kryeministrin Edi Rama, ku qeveria ka shprehur gatishmërinë për ta bërë objektin e Spaçit të aksesueshëm, duke ruajtur natyrën e tij historike si një objekt kujtese.
“Kur panë që qeveria e mbështeste projektin për të bërë një ndërhyrje, për ta rivitalizuar, për ta bërë të aksesueshëm – sepse ashtu nuk hyn dot, aty mund të hysh deri në oborr – ne menduam që një pjesëze, pra dekorin, ta përdorim. Nuk do preket asgjë. Të gjitha ato kolona, të gjitha ato parrulla që thotë Fatosi, që i ka merak, po unë i kam edhe më merak se jam marrë shumë me filma dhe dokumentarë – nuk do të preken. Do punohet me efekte speciale,” – tha Ajazi.
