Në finalen e një procesi që u zvarrit për më shumë se shtatë vite, Gjykata e Tiranës dënoi me burgim të përjetshëm Bledar Jambellin dhe Kristaq Lecin, të akuzuar për vrasjen e kryekomisar Artan Cukut, në derën e pallatit ku banonte në rrugën e Kosovarëve. Jambelli akuzohet si organizator dhe financues i vrasjes së Cukut, pasi në kohën kur drejtonte Policinë e Vlorës, e kishte arrestuar si të dyshuar për vrasjen e Armando Delajt. Jambelli u lirua pas dy vitesh burg dhe thuri planin për vrasjen e Cukut, në bashkëpunim me Lecin. Si ekzekutor veproi Mikel Shallari, i cili është dënuar me 10 vite burgim, për shkak se pranoi të bashkëpunonte me drejtësinë dhe mori statusin e të penduarit. Ndërsa Kristaq Leci ka vepruar si bashkëpunëtori kryesor i Jambellit; për këtë arsye është dënuar po ashtu me dënim maksimal, atë të përjetshëm. Jambelli dhe Leci u arrestuan në Greqi, por ekstradimi i tyre në Shqipëri u refuzua.
