Kryeministri Edi Rama do të zhvillojë një takim me shqiptarët në Londër këtë të diel, në kuadër të turit të bashkëbisedimit me diasporën, pas vendosjes së së drejtës së votës për shqiptarët jashtë vendit. Takimi, i titulluar “Krenar për Shqipërinë”, do të mbahet në orën 12:00 dhe është pjesë e përgatitjeve për zgjedhjet parlamentare të vitit 2025. Më herët, Rama ka zhvilluar takime të ngjashme me diasporën në Greqi, Itali dhe SHBA. Në të njëjtën kohë, kryeministri ka promovuar edhe Akademinë Politike të Partisë Socialiste, një nismë për të angazhuar të rinj të mirëshkolluar dhe të interesuar për politikë. Kjo akademi synon të rienergjizojë Partinë Socialiste duke u ofruar të rinjve njohuri mbi historinë dhe idetë e partive progresiste, si dhe lidershipin modern. Lektorë të shquar nga fusha të ndryshme kontribuojnë në këtë iniciativë, e cila shihet si një mundësi për zhvillimin politik të brezit të ri.
