Tensione të forta u shënuan në nisje të mbledhjes së Komisionit të Etikës, ku po diskutohej kërkesa e grupit parlamentar socialist për masat disiplinore ndaj 24 deputetëve demokratë. Socialistët i akuzojnë deputetët demokratë për shkaktimin e tensioneve në seancën e fundit parlamentare.
Në qendër të përplasjes ishte deputeti demokrat Flamur Noka, i cili sapo hyri në sallën ku do të mbahej mbledhja, kërkoi menjëherë largimin e Gardës së Republikës nga salla. Noka nuk kurseu akuzat ndaj deputetëve socialistë, duke i quajtur “hajdutë” dhe duke këmbëngulur që garda duhej të dilte jashtë, pasi, sipas tij, “ky është Kuvendi i Shqipërisë” dhe jo një vend ku duhej prania e forcave të sigurisë.
Përplasja verbale dhe tensionet mes dy palëve zgjatën disa minuta, duke detyruar kryetaren e komisionit, Klotilda Bushka, të ndërpresë mbledhjen për të qetësuar situatën.
