Presidenti amerikan Donald Trump do të mbledhë sot ekipin e tij më të afërt për të diskutuar mbi rrezikun e sulmit iranian ndaj bazave ushtarake amerikane në Lindjen e Mesme, veçanërisht në Katar.
Sipas burimeve përmasat e hakmarrjes iraniane, veçanërisht numri i viktimave, do të jenë vendimtare për strategjinë e reagimit amerikan. Diskutimet përfshijnë edhe mundësinë që SHBA të përfshihet më thellë në konfliktin mes Izraelit dhe Iranit.
“Presidenti pritet të zhvillojë një takim urgjent me ekipin e tij në orën 19:00 (CET), për të analizuar kërcënimin. Trump ka paralajmëruar se çdo hakmarrje do të përballet me një përgjigje shumë më të ashpër sesa ajo e parë gjatë sulmit të fundit amerikan ndaj objekteve bërthamore iraniane”.
Ndërkohë, Katari ka njoftuar mbylljen e përkohshme të hapësirës së tij ajrore si një masë parandaluese ndaj kërcënimeve të mundshme iraniane. Baza ajrore Al-Udeid, e vendosur në Katar, është një nga bazat më të mëdha ushtarake amerikane në rajon. Gjatë javëve të fundit, shumë avionë dhe pjesëtarë të personelit janë evakuuar nga kjo bazë.
