Në një deklaratë të përbashkët të lëshuar këtë të diel, liderët e Francës, Gjermanisë dhe Mbretërisë së Bashkuar i kanë bërë thirrje Iranit që të përmbahet nga çdo veprim që mund të përshkallëzojë më tej tensionet në Lindjen e Mesme, pas sulmeve të fundit të Shteteve të Bashkuara ndaj objekteve të dyshuara bërthamore iraniane.
Presidenti francez Emmanuel Macron, kancelari gjerman Friedrich Merz dhe kryeministri britanik Keir Starmer theksuan rëndësinë e rikthimit në tryezën e bisedimeve, duke i kërkuar Iranit angazhim të menjëhershëm në negociata për një marrëveshje të re gjithëpërfshirëse mbi programin e tij bërthamor.
“Ne jemi të gatshëm të kontribuojmë për këtë qëllim në koordinim me të gjitha palët”, thuhet në deklaratën e përbashkët të tre udhëheqësve evropianë.
Apeli vjen në një moment delikat për rajonin, ku përplasjet politike dhe ndërhyrjet ushtarake kanë rritur ndjeshëm pasigurinë dhe rrezikun për një përshkallëzim të mëtejshëm të krizës. Liderët evropianë theksojnë se dialogu diplomatik është rruga e vetme për të garantuar stabilitet dhe siguri afatgjatë në Lindjen e Mesme.
