Prokurorët e Posaçëm do të zbërthejnë me ndihmën e ekspertëve telefonin celular që iu gjet në qeli Laert Haxhiut, një prej njerëzve më të rrezikshëm të botës së krimit. Prokurorët kanë interes të dinë kontaktet që kishte jashtë burgut Haxhiu dhe nëse nga burgu është përfshirë në aktivitet kriminal duke urdhëruar “ushtarët” e tij për të kryer krime të tjera. Haxhiu njihet si kundërshtar i përbetuar i ish-kreut të Bandës së Lushnjës, Aldo Bare. Ai është i dënuar me burgim të përjetshëm për masakrën e vitit 2017 në Lushnjë, ndërsa po gjykohet për krime të rënda. Krimet e bandës së tij po rrëfehen në Gjykatën e Posaçme nga i penduari i drejtësisë, Artan Tafani.
